Tapati 24 no atopa , 8h30 : Mata'i na mua mai, vero i te hitia'a o te rä, e ua pohe te matini

Vaira'a i te  24/10/2010 hora 8h30 : N 13°51 E 127°54
Tere : 5 maire

Mai roto i te puta fanora'a no teie mahana :

avei'a 321, e toe nei  421 maire na mua e tapae ai i Aparri (firipino). Mai inanahi ra, puai mau te mata'i, e te ua ato'a. Ua pouri roa te ra'i, e pinepine te vero ua. Mai ta Hervé i faaite ati, mai to matou faaru'eraa ia Palau, ua fati ia matau te piti o te hatua matini e faatere nei te pämu pape. Aore ia e matini faahou, te tuatapapa nei matou te ho'e rave'a no te tata'i !

Ua tamata matou rave rahi faanahoraa te mahana taato'a : Te tari'a a te ho'e tia'a, te ho'e uaua tafai hia, te taamuraa o te mata hi'o atea, tetahi taura ... Atire, o Koronui tei faanaho mai tetahi taura  dynéma firi hia... E o vau nei, huri ta'ere i raro, faaö ia'u nei i roto i te piha matini ... taueue noa mai te are i te vaa, tape'ape'a no ai te tapo'i eiaha ia riu hia ... Aue ia 'oa'oa, ua tere faahou te matini !

Te mana'o a Hervé raua o Punua ia faaohipa hia te hatua i mutu, tafai hia i roto te tahi totini taura, e tape'a noa ia matou i te reira no tetahi atu taime e mutu faahou ai !

Ia matou e tutonu nei, e ape ape noa tei te mau vero e te mau mata'i rarofa'i, ua riro ia ei mana'o tauturu e ite te vai ra teie matini ia tapae atu matou i te uahu no Aparri...